حلفونى يا غالية أرسمك قصيدة لــ محمد صديق

مسكوني ورقة وقلم وحلفوني ارسمك
حيروني .. من أي صورة وأي جانب أرسمك
توهت بعيوني و ابتديت اسرح وايا جمالك ....
هـــــ ارسمك ...
بس يا تري ارسم غيطانك فلاحينك
ولا ارسم الشمس اللي ساطعة فوق جبينك
كل يوم تحكى حكاية ...

ابنك الفلاح همام
يفلح في أرضك ويطرح الخير للأنام
بيصحى بدرى يزرع ويسقى
شايل فاسه وعلى الجبين عرقه زى الندا
ومراته جيباله الغدا وجاية بتجرى
وعياله حواليه مبسوطين
بيلعبوا فى الخضرة عند النخلتين
أولاد وايا صبايا
أدى صورة تنفع ولا اعظم رواية ..
ولا أقولك
هـــ ارسم النيل الجميل اللى ليه علينا حق
اللى غمر أرضك وشق
شق أرضك ورواكى من زمن طويل
اللى خلى فيكى جنة فيها ضلة ما لها فى الكون مثيل
وميته دى تروى العليل
أنا هرسم النيل وفيه فلوكة عايمة
وخضرة حوليه دايمة
والنخلتين وشمس ساطعة على الجبهتين
كل يوم تحكى حكاية .....
ولا أقولك ..
هـــ ارسم بحورك
دول عيونك .... أكبر حب ليا
عشت فيهم من بورسعيد لأسكندرية
أحلى شط واحلى مية
موجودين فى الدنيا دية
موجودين علشان عظمتك
وابنك اللى فرحان بيضحك
كل ما يصطادله سمكة
بيفرح بالرزق مهما كان قليل
ويشكر رب البرايا ...
ولا ليه مـــارسم رمالك
أرسم رمالك اللى بلون الدهب
اصلها السر فى جمالك
منظرها خلى عقلى ذهب
وأرسم صحاريكى العـظيمة
الجميلة بلون سمارك
اللى بكرة هتبقى جنة
لما تتحنى بيها ايدين ولادك
ويدق طبل الفرح بابك
ويرفعولك أعلى راية ....
طب وليه ما ارسم طيورك
هـــ أرسم النسر اللى فارد جناحه فى قلب ساحتك
فى السما الصافية اللى شاهدة على سماحتك
وارسم عصافيرك الصغيرين
وارسم صقورك اللى فى الجو بيحموكى من الغربان
وارسم كناريا با انتصارك يعزف احلى الالحان
وارسم كروان بيدعيلك بالامان
وارسم كمان بغبغان ما هو أصله صاحبى
دايما بيردد اسمك وبيقول عشتى يا بلادى يا اغلى الاوطان
ده كله بيحبك طيورك وشعبك
أولاد وايا صبايا ...
ولا اقولك ارسم آثارك و الاهرمات
وارسم مسلة فيها تاريخ شعب
عش على ارضك ومات
وارسم تاريخى جنبها انا المصرى
بيحكوا عنى حكايات
هــــ أرسم آثارك اللى باقية تشهد على عظمتك
فى حروبك وفى سلامك
وانتصارك والعالم يعرف بقيمتك
ويشهد با احترامك
ويقر بخلودك ورايا ...

صدقينى يا حبيبتى محتار انا ازاى ارسمك
انتى فيكى كل واحة عايزة منى الف لوحة
ومية تانى وفوق المية ألف
ده انتى فيكى كل منظر ليل نهار
بيبان ويظهر شكل تانى مختلف
لون سمارك وايا نيلك والجمال
حاجة خلت قلبى مال ودوبنى انا بالنهاية....

انا هــ ارسمك من عيون امى وابويا
اللى عايشين جوه ارضك
ومعاهم كمان اختى واخويا
اللى بكرة هيكونوا سبب سعدك ومجدك
انا هرسمك خضرة ونيل وبحر
وسما صافية وسد النهر
وفلاح صاحى من آذان الفجر
وصقر يحميكى من عيون الغدر
ونسر صاحى يرفع راياتك فى يوم النصر
وارسم هرم وابو الهول
اللى ساكت طول الدهر
يحكى بصمته عظمتك وشعبك عظيم القدر
انا هــ ارسم شجرا خضرا
فوق غصونها كناريا وبغبغان
وارسم كروان بيغنى احلى الالحان
وبيدعيلك بالامان ...

وهـــ ارسمك جنة وابخرك وهــطهرك
من عين كل حاسد ومن كل شيطان
وهـــأقول عيشتى يا بلادى يا أغلى الاوطان
وهلون اللوحة بدمى
ولآخر قطرة فى دمايا
وهـــ قول فداكى يا أمى
وكل دمى مش كفاية
و هـــ ردد أسمك فى قلبى
و هــــ أقولك على اللى جوايا
وآخر كلامى يا بلادى
عيشى حرة للنهاية
عيشى حرة للنهاية ...

كـــــــــلــمــات : محمد احمد صديق
اسيوط | موشا | شاعر الحريـــة