تـــلامــيــذ قصيدة لـــ زينب أبو الفتوح - السويس (ثورة مصر )

لساك ماصدقتش
إن العيال كبروا ..
إن الصغار فهموا
من قهر السنين
زهقوا ...
والظلم بيقسي
وربك ..مايهملشي
حبة عيال تلاميذ
مش مشغولين بالسياسه
ضحكوا علي العواجيز
زلزلوا ..عرش الرياسه
عملوا افتراض ..للحق
عروا ف زيف مجدهم
كشفوا جريمة الكياسه
لساك ...مغمينك
سايقينك ..كما الكفيف
بيفهموك اننا ...
بنموت علي روحنا
م الخوف
لسه بيرعبنا صوت ..
خطوة العريف
وشكل بوكس الحكومه
وبيادة الباشا
لساك ...علي نيتك
عايش علي الهامش
واحنا ..نصيبنا القهر
جوا البدن ..ناهش
صبر السنين انفجر
وخلاص ..مابنخافشي
اللعب بحياتنا ...
موضه متنفعشي
صوتنا بقي ثوره
بتفوق الساكت
وتصحي ف النايمين
مصر اللي بتقول لنا
ياللا ارجموا الفاسدين
عروا وشوشهم ع الملأ
ومايصعبوش علي حد
شوفوا العيال الجساره
بحبة براءه وبساله
سحبونا من ضعفنا
هدوا عروش الجبابره
قدروا بعقل رزين
وطهارة الياسمين
بنقاء سندريللا
وخيال علاء الدين
بلمس زرار الحق
تنطق بني آدمين
تصرخ حناجر م الألم
والذل ليها ...سنين
يتحرك الساكن
ويرنوا ف الأجراس
مصر الأسيره اهي عادت
وشعبها الحراس
لا هاتمتلك تاني
ولاتبكي لحظة ضيم
ولا تتخنق م الخوف
ولا تبكي ع المظاليم
ثوره علي الطاغي
يا مصر طول عمرك
ومحرره الدنيا
النور ..رهين أمرك
خلاص ..خلاص عدتي
والبركه ف العصافير
رفرف جناح حلمهم
كسر بيبان الأقفاص
طارت يماماتك
وفردتي روحك ع المكان
لميتي من تحتهم ...
فوارغ رصاص

زينب أبو الفتوح _السويس
الحقوق محفوظة لـــ زينب أبو الفتوح @