ابننا كان بيحمي الحدود

من طرف ahmed fathy الإثنين أغسطس 06, 2012 6:19 pm

"ابننا كان بيحمي الحدود"
جندي صايم قاعد بيقرا في القران
والغدر بيراقب وجوا منه الف شيطان
وفجأة يضرب ضربته ضربة خسيس وكلب جبان
والجندي يرد بكل شجاعة وكل إيمان
والرصاص شغال مطر في كل مكان
والجندي حياته في خطر وفاتح دراعه للموت وواخده بالأحضان
لكن رصاص الغدر صابه اخد منه زهرة شبابه وعرف ان ده وقته عرف انه آن الأوان
عرف ان الشهادة مكتوباله وجنة الرحمن
وفجأة يسمع الأذان
الله أكبر الله أكبر ترج في الأركان
نطق الشهادة وقال
اشهدي يا جبال
اشهدي يا صخور واشهدي يا رمال
قبلت بالترحال
وشفت ياما أهوال
بس النهاردة
علي ارض سينا الطاهرة انا دمي سال
علي ارض سينا رصاص الغدر من جسمي طال
وقلبي امي عليا انفطر واتيتموا بعدي العيال
واللي قتلني ده لسه عايش و بيغني علي روحي ميت موال
والحزن جوا قلبي مكتوم ومتشال
مش عشان موتي واقولها باعلي صوتي انا اموت الف مرة و مصر تبقي في أحسن حال
انا بس خايف دمي يروح هدر ويقولوا لامي دا كان قدر
وحقي يبقي ضرب خيال
معقولة دمي يكون حلال
ودم جنود الإحتلال غال
وبعد ما نطرد اليهود والكرامة لينا تعود
نرضي نعيش في إذلال
مش عاوزين معاهدة سلام
وأي معاهدة للكلام
مش عاوزين مسكنات ووعود
ولا أوسمة وأنواط وورود
ولا جنازة عسكرية علي روح المفقود
ولا دموع تسيل علي الخدود
ده دم ونار ومصر ليها تار ودي مش محتاجة شهود
عاوزين ردود
والحق لينا يعود
وسفير الصهاينة متهان ومطرود
واسم مصر وجيشها يكون موجود
أصل الردود مصيرها الخلود مش الوعود
وإسرائيل ارض اليهود
تعرف انه للصبر حدود
وان دم جنود مصر مش رخيص وحايجي يوم ويكون مردود
وانا منتظر يوم رجوع الكرامة حانتظر اليوم الموعود
لأجل ارفع راسي ويفرح بيا ناسي ويقولوا ابننا مات شهيد ابننا كان بيحمي الحدود

منقولة من موقع فيس بوك

خواطر دكتور شاطر